Mark 5

Abulutu Ɓa Fi Oza Ce N Wye-Wye Yi

1– 2Shi ɓa ɓei piya kpe nkma dehi, eza doho nwo ɓei n alijanu yi, wa gmi ɓe nsi n na vingwo, Yesu woi bwa kakashi n eya.

3– 4Eza deye ɓei zhin woi sase dna na vingwo nu, wo ɓei n kalai ko a la wo pa n na gmai a ku asunkna fi wo n na pita, wa gbe agma ya wa bma asunkna ya, wa lo wo nya. Zaho to ɓo ikoi wa gyi wo shi m. 5N nyipyeyi n sukwoyi vinya, woi zan dna n na vingwo n na pei woi fi aku, woi sa wohin ya n na kuta yi.

6She wo ɓei gye Yesu nkpai, wa busi lo wa ce akwo-kwo shi nwo abye.

7– 8Yesu wa daɓo n alijanu yi wa gna, “zafun nukwoi gmiya ɓe” Kwa sawyi n kalai, “Yesu, Shekwoyi iko da Nugun, Ho ye ha zhin mi knihi nu a? Ntu Shekwoyi ɓo, to ga mi wahala m.”

9Yesu wa nya wo ge, ayi ho ge na? Alijanu kwa ci ge, “Begye, ntu ge yi mwa begye fi lo n za deye mi.” 10Alijanu ɓa gyi Yesu wye ge, wo to tnu nɓai nkpai m.

11Dna sayi mi, a burutu ho ɓei zhi nmwa begye ɓai gyi anyagyi n pe sepa. 12Ɓa gyi wye ge, “Tnu yi na burutu yi mi.”

13Yesu wa ga ɓa gbe. A zafun nukwoyi ɓa kun n za yi mi ɓa lo fyi na burutu yi mi. A burutu yi vinya, ɓa busi shin zhi peyi ɓa kafi ʼla, nuwan shin ɓayi.

14A burutu da busi lo a kauye ɓai wu lafiya, aza yi knuɓe ɓai gye n ɓahin yi. 15Safyewyi a-za ye-zhi n mwa aba Yesu ɓei gni nyi. Ama shi ɓa ɓei gye zayi sase ma Yesu dna n wohin hankali, ɓa wo dna. 16Aza n ɓa ɓei gye ɓo kwo ɓei zhin, ɓa wu lafiya laɓa. 17Aza ya Yesu wye-gyi ge, Wo lo wonya Wa faɓa. 18Wa je eya lo. Eza wo ɓei na lijanu yi nyi, wa gyi Yesu wye ge wa knulo n Woi. 19Yesu wa ciwo ge awo, “Lapyi da ha nugundo ho gna ɓa nya Shekwoyi ku zhin ho, shi wo sun-sun gyei lo jesun.”

20Wa ya azhi ngnu awo vi (Dikapolis kni) woi gna za aɓo adnagmayi n Yesu wa zhin wo, ca wo aza n mwa.

Aɓo Wo-woyi Kagna Nya

21Sa Yesu ɓela pi ola ya n ʼya yi, aza yezhi n wo aba n mwa n ʼla gbe.

22Aduwa nyakun tukwoda ɓe, ai yiwo ge Yairus, wa ɓe wa yashi n Yesu abye. 23Woi gyi wo wye ge? Wo kawo nyignu gna, “Wola ga fyi, mi gyi Ho wye, ɓe Halo Ho tuwo Ho bwa wa ka gna.”

24Yesu wa viwo lo, aza viwo na vun. 25Dna na za nɓa ɓei viwo nyi, nyikwoza ho ɓei dna n nyasan-yi aye awo-cei-aba ami yi zewo ya. 26Wo ɓo ku wahala sin woi wu agyiwyeya n mwa n na shigbe-da aba, ama to wa kagna m, sai koyi gya bye-abye nu. 27Wo ɓei ku wo aɓo awo-woyi n Yesu zhin, cenu ɓei zhin wa viwo na vun dna deji, wa towo ʼje bwa.

28Ntuge wo ɓei zhin nubo fyi wo mi, “N ma towa ʼje bwa kawai, mi ɓa kagna.” 29Shi wo ɓei to wo ʼje bwa n kusun, wa ze kagna yi, o wami-zeya zan n sayi-sayi yi, waku wonya kpege wola kagna bwa!

30Yesu wa kpe n sagmanyi ge kagna iko la gmi n Wo, Wa pmi awye shi aza Wa cige, “Nyika to mi jekpe bwa?”

31Owo abara nya Wo ge, “Aza n ɓa sheho kna zhl mwa nyi, Hoi gni Hoi nyaɓo ge nyika to Ho bwa?”

32Ama Wa ce Wa sha-wye laɓa n ʼna bai Wagye ʼza n wa to Wo bwa. 33Nyikwo-za ho, shi wo ɓei gye ɓo kwa zhin wo, wa ɓe n dnayi, woi vin, wa cakwo-kwo shin Wa bye wa gna Wo ɓo wa zhin. 34Wa gna wo ge, “ho gaiciya ga, kwo la ho kagna, lo ho nya n lafiya yi.”

35Woi ye gni Woi daɓo n woi atnu-tnu yi ɓa ɓe ɓai kun n Yairus puwa ge esa la diya, owo nyigun lafi, apma to lo Yesu wa shan lom. 36Ama to Yesu wa gye wo anuwan n ɓa ɓeda yim, waci Yairus ge, “To wo dnam, la gaiciya ga Mi.”

37Yesu wa kpe a za zhi n bmi to wa ye ge ɓa lo api min; akpe Bitrus, n Yakubu yi, n Yohanna yi. 38Sanu ɓa ɓei lofi ɓa gye aza fi ɓai cibwi, ɓai ɓewyi, har ɓaku jeje. 39Wa lo mi, Wa daɓo na zayi, “Knihi nu zhin fyei cibwia? Eɓi to fim, wo wangye nu kawai.”

40Ɓa mawo san wyegbaci nya, ama Wa gnaɓa ge ɓa la kun. Wala ɓiyi ʼya nwo dadayi n Wa barayi ɓa lolo nyakun mi n ʼɓiyi ɓei yadna nyi.

41Wa ta bwa shi wo nbwa, wa ci ge, ɓinyikwoi lakala. (Owo aye ɓei nyi awo-cei-aba nu) 42Wa lakala gni-agni, wa ya zan-zan, ce awo owo azamayi. 43Yesu wa tu ɓa gbe n kala yi ge, ɓa to ye zaho-zahoi wa kpe cem. Wa gna ɓa ge ɓa ga ɓinyikwoyi hi nyagyi.